NAHASMENDU OBSESIBO KONPULTSIBOA
Nahasmendu Obsesibo Konpultsiboa, NOK, antsietate nahasmendua

Nahasmendu obsesibo-konpultsiboa (NOK) antsietate nahasmendu mota bat da. Nahasmendu obsesibo-konpultsiboa duten pertsonek pentsamendu iraunkorrak, estugarriak eta aztoratzaileak dituzte (obsesio deiturikoak). Obsesio horiek eta eragindako antsietatea kontrolatzeko helburuz, NOK duten pertsonek erritualak egiteko premiazko beharra sentitzen dute (portaera horiei konpultsio deritze). Azkenean, gehienetan, erritualek pertsonak kontrolatzen dituzte.

Oinarrizko sintomak pazienteari berari gaizberak iruditzen zaizkion ideia obsesiboak dira (pazientearentzat inbaditzaileak, arrotzak, arraroak, errepikakorrak, itogarriak). Nahasmendu obsesibo-konpultsiboa oso arduratsuak, zorrotzak eta zehatzak diren pertsonetan agertu ohi da. Pertsona horiek ideia finkoak izaten dituzte, zirkularrak, eta batzuetan erritualistak izan daitezke n aldiz gauzatzen dituzten eguneroko portaerekin. Beste batzuetan, haien eskrupulu jarrerak areagotzen dituzte (garbitasuna edo desinfekzioa), kutsa ditzaten edo hirugarrenak kutsatzea saihesteko...

Nahasmendu obsesibo-konpultsiboa nerabezaroan hasi ohi da eta, oro har, kronikoa izan ohi da, gorabeherekin; hala, aldi batzuetan hobera egiten dute, eta beste batzuetan, okerrera. Sintomak agertu eta desagertu egin daitezke, denborarekin murriztu, edo okertu. NOKa larria izatera iristen bada, gerta liteke pertsonak lan egiteko edo etxeko ohiko erantzukizunak betetzeko gaitasunik gabe geratzea.

Obsesioen adibideetako batzuk germenekiko beldurra edo min hartzeko beldurra izan daitezke. Konpultsioen artean, eskuak garbitzea, gauzak zenbatzea edo behin eta berriz gainbegiratzea edo garbitzea egon daitezke. Erritu eta pentsamendu horiek eguneroko bizitza oztopatzen dute.

Ikertzaileen ustez, gerta liteke NOK duten pertsonen garuneko zirkuituek ez behar bezala funtzionatzea. Familiako joera izan ohi da nahasmendu hori. Tratamenduen barruan psikoterapia, psikofarmakologia edo bien konbinazioa daude.

Frogatu da terapia kognitibo-konduktuala tresna eraginkorra dela NOKa tratatzeko, bereziki esposizio teknikaren bidez egiten denean. Paziente horietako gehienek hobera egiten dute teknika kognitibo-konduktual hutsak erabilita, eta tarteka tratamendu farmakologikoekin konbinatzea aholkatzen da, kasuak larriak badira edo depresio batez lagunduta badatoz.

Adierazi beharra dago pazientearen laguntza ezinbestekoa dela, antsietatea eragiten dioten egoerei egin beharko baitie aurre tratamenduaren funtsezko alderdi gisa. Obsesioa duen pazienteak sintomak ezkutatu ohi baditu ere, oso garrantzitsua da lehenengo saioetan terapeutari ahal bezain beste laguntzea.

Era berean, komenigarritzat jotzen dugu pazientearekin bizi den pertsonak ere terapeutari laguntzea, tratamendu denbora murrizteko xedez, bereziki erantzunaren prebentzioa aplikatu behar den kasuetan (eskuak maiz garbitzea, argiak behin eta berriz piztu edo itzaltzea, eta abar).